شەونم یەحیا، لە ساڵی ١٩٧٧ لە شاری کەرکوک لە دایکبووە، کۆمەڵناسە و لە چەندین بواری زانستی کۆمەڵایەتی و فیکریدا بەشدارە بە توێژینەوە. لە ساڵی ٢٠٠٦ دا بەکالۆریۆسی لە بەشی کۆمەڵناسی کۆلێژی ئاداب لە زانکۆی سەلاحەدین لە هەولێر بەدەست هێناوە. لە ساڵی ٢٠١٢ لە فەرەنسا درێژە بە خوێندن دەدات و بڕوانامەی ماستەر لە کۆمەڵناسی لە ئیکۆل هاوتس بۆ زانستە کۆمەڵایەتیەکان (EHESS) لە پاریس بەدەست دەهێنێت. لە ساڵی ٢٠١٦ بروانامەی دکتۆرای لە فەلسەفەی کۆمەڵناسی لە زانکۆی سۆربۆن (پاریسی یەکەم) بە سەرپەرشتی پرۆفیسۆر جان سالم بەدەست هێناوە.

لە ڕووی پیشەییەوە ناوبراو لە ساڵی ٢٠٠٠ ەوە وەک توێژەر لە وەزارەتی پەروەردەی حکومەتی هەرێمی کوردستان کاری کردووە، هاوکات لە نێوان ساڵانی ٢٠١٩ بۆ ٢٠٢٠ لە زانکۆی فەرەنسی-لوبنانی لە هەولێر وانەبێژ بووە. لە ساڵی ٢٠٢٣ وەک سەرۆکی لیژنەی زانستی دەستنیشانکراوە لە گۆڤاری نێودەوڵەتی بۆ لێکۆڵینەوەی کوردی لە ناوەندی دیموکراسی عەرەبی لە بەرلین و ئەندامی دەستەی ڕاوێژکاریشە لە گۆڤاری زانستە کۆمەڵایەتییەکان. لە هامان کاتیشدا، سەپەرشتیاری زانستیشە لە کۆلێژ ئەپلای بۆ زانستە کردارییەکان لە لەندەن.

هاوشانی کاری پیشەیی، شەونم یەحیا خاوەنی چەندین بابەت و کتێبی زانستییە لە سەر ڕۆڵی ڕۆشنبیر و پرسەکانی تایبەت بە ژن و جێندەر لە کۆنتیکستی فەلسەفەی کۆمەڵناسی  و دیموکراسی و دەوڵەت و تیرۆر و ئەو پرسانەی پەیوەستن بە گۆڕانی کۆمەڵگەی کوردییەوە. لێکۆڵینەوەکانی لە پرسە کۆمەڵایەتی و سیاسییەکاندا لە کوردستان و لە ڕوانگەیەکی فراوانتر لە ڕۆژهەڵاتی ناوەڕاستیشدا، بەشدارن بۆ تێگەیشتنێکی باشتر لەو ناوچانە.

بۆ دابەزاندنی سیڤیی و زانیاری زیاتر لەسەر شارەزایی شەونم یەحیا لە بواری کۆمەڵناسی، کلیک لێرە بکە

لەم بەشە، بە خۆشحاڵیەوە، چیرۆکی سەرکەوتنی هەر هاوڵاتیەکی هەرێمی کوردستان بڵاودەکەینەوە کە پێشینەی ئەکادیمی و پیشەیی لە فەرەنسا هەبێت. بۆ ئەم مەبەستە ئەتوانن سیڤی و پوختەیەک لە پاشخانی زانستی و پیشەییتانمان بۆ بنێرن لە ڕێگای ئەم ئیمەیڵە (contact@france.gov.krd).