سازدانی ئاهەنگی جەژنی نەورۆز ​لە شاری لیۆن

لە ٢٢ی ئازاری ٢٠٢٦، نوێنەرایەتی حکومەتی هەرێمی کوردستان لە فەڕەنسا، ئاهەنگێکی جەماوەریی گەورەی بەبۆنەی جەژنی نەورۆز و سەری ساڵی کوردی لە شاری "سانت شامۆن" (نزیك شاری لیۆن) ڕێکخست. ئەم ئاهەنگە نزیکەی هەزار میوانی لە ڕەوەندی کوردستانی کۆکردەوە، کە تێیدا کاتێکی پڕ لە شادی و تەباییان بەسەر برد و جەختیان لەسەر پاراستنی دابونەریتە ڕەسەنەکانیان کردەوە.

سه‌ره‌تای ئاهەنگەکە به‌ چه‌ند وته‌یه‌ك له‌لایه‌ن علی دۆلەمەری، نوێنەری حکومەتی هەرێمی کوردستان لە فەرەنسا ده‌ستی پێ كرد کە تێیدا پیرۆزبایی جەژنی نەورۆز و سەری ساڵی نوێی کوردی لە ئامادەبوانی ئاهەنگەکە کرد. هەروەها پشتگیری حکومەتی هەرێمی کوردستانی بۆ کوردانی شاری لیۆن و دەوروبەری دەربری. دواتر نوێنەری حکومەتی هەرێمی کوردستان بە گرنگیەوە ئاماژەی بە تەبایی و یەکگرتوویی کورد کرد لەو قۆناغە هەستیارەی ئێستادا و هیوای خواست کە هەمووان لە ئاست تەنگەشە و ناخۆشیەکان یەک هەڵوێستبن.

بەرنامە هونەرییەکەی ئاهەنگەکە ڕەنگدانەوەی هەرچوارپارچەی کوردستان بوو. چەندین هونەرمەندی ناودار بەشدارییان لەم ئاهەنگەدا کرد کە هەر یەکێکیان لە ڕێگەی مۆسیقا و ئاوازەکانیانەوە نوێنەرایەتی بەشێکی کوردستانیان دەکرد. ئامادەبووان چێژیان لە دەنگ و نمایشی هەریەکە لە هونەرمەندان سەمیر یوسف لە باکور، کامەڕان ساڵح لە باشور، دڵنیا ڕەزازی لە ڕۆژهەڵات و سلێمان عەزیز لە ڕۆژئاوا وەرگرت.

شایەنی باسە کە ئاهانگی نەورۆزی ئەمساڵ بە هاوکاری و هەماهەنگی لەگەل کۆنفیدراسیۆنی ڕەوەندی کوردستانی و کۆمەڵەی "خۆری ٢١" و بە بەشداری ئەنستیوتی فەرەنسی لە هەولێر رێکخرا کە بووە هۆی جێگای ڕەزامەندی و دەستخۆشی زۆری ئامادەبووان و دەنگدانەوەیەکی ئەرێنیانەی زۆری بۆنەکە.

هەر لە ئاهەنگەکە نوێنەری حکومەت دیاری رێزلێنانی پێشکەش بە چەند کەسایەتیەکی دیار و چەند رێکخراوێکی کوردی لە فەرەنسا کرد لە پای خەبات و تێکۆشانیان بۆ سەرخستنی دۆزی کورد لە فەرەنسا. 

بەم زووانە ڤیدیۆی ئاگەنگەکە بڵاو دەکرێتەوە. چاوەڕوانبن.