هەواڵنامەی مانگانە

نوێنەر

عەلی دۆڵەمەڕی، نوێنەری حکومەتی هەرێمی کوردستان لە فەڕەنسا، لە ١ی تەممووزی ١٩٧٨ لە قەزای مێرگەسۆری سەر بە پارێزگای هەولێر، لە بنەماڵەیەکی شۆڕشگێڕ و کوردپەروەر لەدایکبووە.

دوای تەواوکردنی قۆناغەکانی خوێندنی سەرەتایی، ناوەندی و ئامادەیی بەسەرکەوتوویی، دۆڵەمەڕی لە کۆلێژی کارگێڕی و ئابووری لە زانکۆی سەلاحەددین دەستی بە خوێندنی باڵا کردووە؛ هەر لەوێش سەرەتای کاری سیاسی و ڕێکخراوەیی لە نێو ڕێزەکانی یەکێتیی قوتابیانی کوردستان دەستپێکردووە و بۆ ماوەی دوو ساڵ بەرپرسی لێژنەی ڕێکخراوەکە بووە. پاشان لە نێوان ساڵانی ٢٠٠٢ و ٢٠٠٣ بەڕێوەبەری ژمێریاری بووە لە وەزارەتی مافی مرۆڤ لە حکومەتی هەرێمی کوردستان.

دواتر بۆ درێژەدان بە خوێندن، لە ساڵی ٢٠٠٣ ڕووی لە وڵاتی فەڕەنسا کردووە و لە زانکۆی سۆربۆن (پاریس ٤) دەستی بە خوێندنی باڵا کردووە و بەسەرکەوتوویی بڕوانامەی ماستەری لە زانستە سیاسییەکان بەدەستهێناوە. پاشان لە هەمان زانکۆدا بڕوانامەی دکتۆرای لە بواری جیۆپۆلیتیکدا بەدەستهێناوە.

لە ساڵی ٢٠٠٩ەوە لە نوێنەرایەتیی حکومەتی هەرێمی کوردستان لە فەڕەنسا دەستبەکاربووە و ساڵێک دواتر وەک جێگری نوێنەر دەستنیشانکراوە. لە حوزەیرانی ٢٠١٦ەوە بە وەکالەت پۆستی نوێنەری حکومەتی هەرێمی کوردستانی لە فەڕەنsa پێبەخشراوە، و لە شوباتی ٢٠١٨ەوە بە فەرمی بۆ پۆستی نوێنەری حکومەتی هەرێمی کوردستان لە فەڕەنسا دەستنیشانکراوە و تاوەکو ئێستاش لە ئەرکەکەی بەردەوامە.

دۆڵەمەڕی ئەزموونێکی دەوڵەمەندی لە بواری دیپلۆماسی و پەیوەندییە نێودەوڵەتییەکاندا هەیە. نزیکەی ٢٠ ساڵە لەم بوارەدا کاردەکات و لەماوەی کارکردنیدا ڕۆڵی بەرچاوی هەبووە لە بەهێزکردنی پێگەی کورد لە فەڕەنسا، پتەوکردنی پەیوەندییەکانی هەرێمی کوردستان و فەڕەنسا لە بوارە جیاجیاکاندا و خزمەتکردنی ڕەوەندی کوردی لە فەڕەنسا.

لە ڕووی نووسینی ئەکادیمیەوە، دۆڵەمەری خاوەنی پەرتووکی جیۆپۆلەتیکی کوردستانی عیراقە کە لە خانەی چاپ و بلاوکردنەوەی گلیف لە پاریس بڵاوكراوەتەوە. هەروەها خاوەنی چەندین ووتار و چاوپێکەوتنی ڕوژنامەوانی تایبەت بە پەیوەندییه نێودەوڵەتییەکانه به زمانەکانی کوردی و فەڕەنسی.